Å bygge heiltidskultur inneber å tenke nytt rundt korleis tenestene og arbeidstida blir organisert. Det er eit stort arbeidskraftpotensial i å redusere deltid, auke stillingane til tilsette, og legge til rette for at ledige stillingar kan lysast ut som heile stillingar. Dette er avgjerande for å sikre kvalitet, kontinuitet og tilstrekkeleg kompetanse i tenestene i dag og i framtida.

Kvifor treng vi å jobbe med heiltidskultur?

Volda kommune har høg andel deltidstilsette. Det ønsker vi å gjere noko med.

Utfordringsbiletet i kommunal sektor er todelt. For det første blir det fleire eldre, som vil gi større etterspurnad etter helse- og omsorgstenester, og der mange har eit meir komplekst sjukdomsbilete enn tidlegare. I tillegg ser vi ei auke i tenestebehov blant barn og unge, og unge vaksne, som treng stabile, trygge fagpersonar gjennom tverrfaglege tenester og god samordning.

Mykje deltid påverkar kvaliteten for brukarane. Det er mykje forsking og kunnskap som syner at heiltidskultur og store stillingar vil gje stor positiv verdi for innbyggarar og brukarar, tilsette og arbeidsgivar. Heiltid vil gjere det lettare å utvikle gode fagmiljø og tilby tenester av god kvalitet. Heiltid er viktig for å rekruttere og behalde kvalifisert fagpersonell, og løyse rekrutteringsutfordringar for berekraftig tenesteutvikling.

Heiltidskultur vert skildra som den avgjerande løysinga for å møte framtidige kompetansebehov.

Heiltidshjulet

Dei positive effektane av heiltidskultur er oppsummert i heiltidshjulet til Leif E. Moland, som viser gevinstar ein kan forvente å få i tenester med heiltids- eller store deltidsstillingar. 

Heiltidshjulet inneheld åtte brukarrelevante kvalitetsvariablar (grøn), fem arbeidsvariablar som er særleg tilsetterelevante (raud), og seks driftsrelevante effektivitetsvariablar (blå), som er ein føresetnad for gode tenester og eit godt arbeidsmiljø.

Heiltidshjulet, utarbeidd av Leif E. Moland, Fafo.

Dei grøne felta viser dei positive effektane for brukarar av tenestene. Brukarane opplever betre kvalitet på tenestene blant anna gjennom:

• Meir forutsigbarheit og kontinuitet ved at dei har færre menneske å halde seg til
• Tenester tilpassa eigen døgnrytme og større ro i kvardagen
• Auka tryggleik

Dei raude felta viser dei positive effektane for arbeidstakarar. Dei tilsette opplever eit betre arbeidsmiljø blant anna gjennom:

• Betre løns- og arbeidsvilkår
• Betre balanse mellom arbeid og familie
• Auka trivsel og lågare sjukefråvær

Dei blå felta viser dei positive effektane for arbeidsgivar. Arbeidsgivar oppnår betre effektivitet blant anna gjennom:

• Betre læringsmiljø, og meir engasjerte og involverte medarbeidarar
• Betre omdøme og attraktivitet som arbeidsgivar
• Meir tid til leiing