Heiltidskultur er ein kultur der heiltidsarbeid er norma, og der majoriteten av dei tilsette jobbar fulltid.

Å bygge heiltidskultur inneber å tenkje nytt om korleis tenester og arbeidstid vert organisert. Det er stort potensial i arbeidskrafta ved å redusere deltidsarbeid, auke stillingsstorleikane og legge til rette for at ledige stillingar kan lysast ut som heile stillingar. Dette er avgjerande for å sikre kvalitet, kontinuitet og tilstrekkeleg kompetanse i tenestene, både i dag og i framtida.

Volda kommune er prega av ein deltidskultur med høg andel deltidstilsette, og kommunen har stort potensial for å auke heiltidsandelen og gjennomsnittleg stillingsstorleik. I 2023 starta kommunen eit prosjekt for å utvikle heiltidskultur.

I 2023 er 46,8 % heiltidstilsette (43,6 % i 2022) og gjennomsnittleg stillingsstorleik er 75,6 % (72,6). For turnustilsette i helse og omsorg er heiltidsandelen 21 % (19,9) og gjennomsnittleg stillingsstorleik 63,7 % (58,9). Nye data viser ein positiv utvikling med ei auke på 5 % både i heiltidsandelen og gjennomsnittleg stillingsprosent for heile organisasjonen, også i turnusstillingane. Ein høgare heiltidsandel er nødvendig for å møte framtidige behov for arbeidskraft, kompetanse og bemanning.

Utfordringane i kommunal sektor er todelt: Auken i eldre befolkning fører til større etterspurnad etter helse- og omsorgstenester med meir komplekse behov, samtidig som det aukar tenestebehovet blant barn, unge og unge vaksne som treng stabile, trygge fagpersonar.

Deltid påverkar kvaliteten på tenestene. Forsking viser at heiltidskultur og større stillingar gir stor positiv verdi for brukarar, pårørande, tilsette og arbeidsgivar. Heiltid gjer det enklare å sikre god tenestekvalitet, utvikle gode fagmiljø og rekruttere kvalifisert fagpersonell, noko som er avgjerande for å møte framtidige kompetansebehov.