Statusoppdatering frå prosjekt - Volda samfunnshus.

– No har vi hatt full fres i vel fire veker etter ferien, dette viser godt att på byggeplassen. På plan 1 er arbeidet med vasking over himling, samt lukking av himling godt i gang, fortel prosjektleiar Steinar Kilen.

– Tekniske fag held på med sluttmontering, og det meste av golvet er ferdig lagt. Det er etablert rein sone i festsalen med tilhøyrande toalettavdelinga.
 

– På plan 2 er det fullt fokus på kinosalen, både innvendig og utvendig. Entreprenøren er snart ferdig med å gipse kinoen innvendig. Tekniske fag er i full sving med å leggje opp alle nødvendige føringar som kino- og konferansesalen treng. Kiosken og toalettavdelinga er klar for måling.
– Tilbygget der det skal kome heis er påbegynt, med fundament og botnplate ferdige. I løpet av veka kjem stillaset på plass, slik at entreprenøren kan starte med å reise byggverket. Grunnentreprenør vil starte opp att arbeidet med omlegging av overvatn. I tillegg skal det etablerast fortau mellom Stormyra og uteplassen ved samfunnshuset for å sikre betre tryggleik for mjuke trafikantar kring Volda samfunnshus.

– Grunna mange endringar og uføresette hendingar har entreprenøren fått utvida fristen sin til 6. november. Målet vårt er at kommunestyret skal få ta i bruk den nye festsalen til møtet sitt i slutten av november. Opning av kinoen og ungdomsklubben er planlagt i løpet av året 2024.

Steinar seier at han håpar at dette blir ei løysing som blir positivt mottatt og som dei fleste blir fornøgde med.

Kontrakt signert med Lydkjelleren

Vi har gleda av å kunngjere at vi har inngått ein kontrakt med Lydkjelleren for levering av AV- utstyr til Volda samfunnshus, seier Steinar Kilen som er prosjektleiar for renoveringa av Volda samfunnshus. 

– Lydkjelleren, kjent for sitt engasjement for kvalitet og miljøvennlege løysningar, kom seirande ut av ein anbodskonkurranse der pris, omsyn til miljø og kvalitet var avgjerande faktorane.

– Planlegging og prosjektering er allereie godt i gang, og vi ser frem til å sjå det ferdige resultatet. Dette vil gi eit betydeleg løft til dei tekniske fasilitetane ved Volda samfunnshus. Installasjonane er planlagt ferdigstilt i løpet av hausten, og vi forventar at det nye utstyret vil berike på interne og eksterne arrangement, seier ein glad prosjektleiar.

Steinar Kilen er prosjektleiar for avdeling eigedom i Volda kommune. Volda kommune

Anbodskonkurranse for møblar og laust inventar

Vidare kan han fortelje at Volda kommune har sendt ut invitasjon til å gje tilbod på møblar og laust inventar til Volda samfunnhus. Tilbodsfristen er 16. september, planlagt levering av møblar er i november. Tilboda vil bli vurdert opp mot pris, miljø og kvalitet.

Overtaking av bygget skal vere i november, men det vil pågå arbeid som gjer at vi ikkje kan ta det fullt i bruk før på nyåret, seier Steinar. 

Volda kommune har landa eit heilskapleg interiørkonsept for Volda Samfunnshus. Interiørarkitekt har tatt spennande val med ulike fargar og materialar som skal gi bygget nytt liv. For å halde på byggets autentiske uttrykk, har vi valt å behalde dei eksisterande teglveggane. I tillegg har dei utarbeida møbleringsplanar for kiosk, ungdomskafe og lounge. 

Vi har bestilt nye kinostolar. Dei nye stolane er leverte av Holmris Form/Funk og produserte av Ferco Seating. Dette er gode kvalitetsstolar som vil ta kinoopplevinga i Volda til nye høgder. Mesteparten av salen blir utstyrt med Paragon 755 komfortstolar, medan dei på bakarste rad kan gle seg til litt ekstra komfort med elektriske reclinarar av typen Verona. Dei har koppehaldar og bordplate som ein kan slå opp.

Ein liten smakebit av stolane i form av bilete er på sin plass – er du like spent som oss på å prøve dei?

Illustrasjon