Birgitte Sungodt Førre

Frå helsesjukepleiar til koordinator for tidleg innsats

Birgitte har bakgrunn som helsesjukepleiar og har alltid vore oppteken av verdien av førebygging. Det var dette engasjementet som motiverte henne til å søkje stillinga som koordinator for tidleg innsats i Volda kommune.

– Eg brenn for tidleg innsats, noko eg har fått innsikt i gjennom både arbeidet mitt og masteroppgåva mi om sårbare barn, basert på Ungdata-undersøkinga. Eg ønskjer å bidra til Volda kommune si satsing på tidleg innsats, og ser dette som ei moglegheit til å kombinere mi faglege erfaring med mi interesse for utviklingsarbeid, fortel Birgitte.

Erfaring frå arbeid med barn, unge og familiar

Gjennom arbeidet sitt i helsestasjon og skulehelseteneste har Birgitte opparbeidd seg verdifull erfaring med å bygge tillitsfulle relasjonar til barn, unge og familiar. Ho har brukt kommunikasjon og relasjonsbygging som sine viktigaste verktøy for å tilpasse tiltak til individuelle behov.

– Eg har òg erfaring frå tverrfagleg samarbeid, som deltaking i BTI-arbeid (Betre Tverrfagleg Innsats), Barn og unges helseteneste og Ungdata-kartlegging i Sande kommune. Dette har gitt meg innsikt i korleis ein kan koordinere tiltak på tvers av ulike tenester, noko eg trur vil vere verdifullt i denne rolla, seier ho.

Utvikling av den nye seksjonen for barn og familie

Som ny koordinator for tidleg innsats skal Birgitte vere med på å forme den nye seksjonen for barn og familie i kommunen. Ho ser føre seg at arbeidet vil basere seg på ein systematisk implementering av BTI-modellen for å sikre at rett hjelp blir gitt på rett stad til rett tid.

– Eg ønskjer å fokusere på tverrfagleg samarbeid og bygging av tillit mellom tenestene som er involverte. Målet mitt er å etablere struktur og rutinar som legg til rette for god og effektiv samhandling. Eg håpar å bidra til at kommunen når fleire barn og familiar som treng hjelp, og at dei får støtte som er tilpassa deira individuelle behov så tidleg som mogleg, seier ho.

Med Birgitte Sungodt Førre på laget styrkar Volda kommune satsinga si på tidleg innsats og tverrfagleg samarbeid. Ho ser fram til å ta fatt på oppgåva og gjere ein forskjell for barn og familiar i kommunen.