Rekneskapsresultatet i Volda 2022– eit resultat som styrkar disposisjonsfondet. 

Det er bra for kommunen har lånegjeld og treng buffer i åra som kjem, seier kommunedirektør Rune Sjurgard og økonomisjef Kari Mette Sundgot. Kommunen fekk eit positivt netto driftsresultat på 25,2 mill. I forhold til totale inntekter utgjer dette ein resultatgrad på 2,1 %. Dette er over kommunen si målsetting på 1,75 % som er nivået for at ein skal ha tilfredsstillande økonomisk handlingsrom. 25,9 mill av netto resultat vert sett av til disposisjonsfondet som dermed er på 99,7 mill kroner.

Stor del av netto driftsresultat kjem av auka skatteinntekter og inntekter knytt til busetting av flyktningar. Skatteinntektene for kommunesektoren vart vesentleg meir enn forutsett i statsbudsjettet, og dette har også hatt positiv verknad for Volda.

Det vart gjort eit særs grundig arbeid med å betre økonomirutinane i kommunen, og dette ser ein effekt av også i år 2022. Det er gledeleg å sjå at ein har god oversikt og styring av økonomien og at ingen av sektorane har eit meirforbruk i 2022.

Oppsummert skuldast resultatet dels uventa eksterne forhold, men også interne forhold ved at vi har god økonomistyring. Det er positivt at vi kan styrke disposisjonsfondet for å ha bufferar i møte med dei makroøkonomiske verknadene knytt til inflasjon, renter og inntektsutvikling.

Det vert gjort merksam på at rekneskapen ikkje er revidert, og at det kan kome endringar etter revisjonen sin gjennomgang.