F.v: Næringslivsrådgjevar Runar Gretland, finanshusleiar Mette Ryste, kommunedirektør Rune Sjurgard, ordførar Sølvi Dimmen, og marknadsområdeleiar Regnskapshuset, Synnøve Hovdenakk.

Møteplass for framtida
Aasenkvartalet, som skal liggje på høgskuleområdet i Volda, er eit omfattande utviklingsprosjekt der målet er å skape ein sentral møteplass for både næringsliv, akademia og lokalsamfunnet. Kultur- og konferansescena blir ein viktig del av dette prosjektet, og ordførar Sølvi Dimmen understrekar at scena vil styrke sambrukssynergiar og skape grunnlag for vidare vekst.

– Her vert Norsk Innovasjonssenter samarbeids- og innovasjonsarena mellom næringsliv og akademia, Høgskulen i Volda, hotell og andre leigetakarar i bygget frå offentleg og privat næringsliv seier Dimmen.

Viktig bidrag frå samfunnsutbyttet
Mette Ryste, leiar for Finanshus Volda i SpareBank 1 SMN, understrekar kor viktig prosjektet er for heile regionen:
– Dette treff oss midt i hjarterota. Vi trur at ein slik møteplass er viktig og vil ha ein svært positiv innverknad både på næringslivet, samhandling med akademia, det offentlege og dermed på heile lokalsamfunnet. 

Kvart år investerer SpareBank 1 SMN delar av overskotet sitt i samfunnsnyttige prosjekt, og støtta til kultur- og konferansescena er del av ein breiare strategi for å fremje vekst og utvikling i Møre og Romsdal og Trøndelag.

Spleiselag for vekst
Tidlegare har Sparebankstiftinga Søre Sunnmøre løyvd 15 millionar kroner til prosjektet, og støtta frå SpareBank 1 SMN byggjer vidare på dette samarbeidet. Visjonen er klar: å skape eit samlande prosjekt som gjer det betre å bu og leve på Søre Sunnmøre.

Kommunedirektør Rune Sjurgard peikar på at prosjektet ikkje berre vil styrke lokalsamfunnet, men også knyte høgskulen tettare til næringslivet og bidra til innovasjon og verdiskaping:
– Høgskulen sit på svært viktig kompetanse som er viktig å få omsett i auka verdiskaping, også lokalt seier Sjurgard.