Då bygget var nytt i 1960 var namnet Øyra skule, og avisa Møre skreiv i si utgåve 21.03.1961 mellom anna: Etter 50 års planlegging, krigshindring og bygdestrid var verket endeleg fullført.
Elevtalet i Volda sentrum auka utover 1900-talet, og behov for ny og større skule melde seg snart. I 1923 fekk ein leige gamleseminaret på Engeset, og Lærarskulen skipa sin eigen øvingsskule i 1932. Dette avhjelpte situasjonen. Planlegging av ny skule heldt likevel fram, og fleire tomter vart diskutert. I 1916 var planen å bygge der rådhuset står i dag.
Etter 2. verdskrig vart ei nemnd nedsett, som kom fram til at Røysbakkflata burde vere skuletomt. Gjennom fleire vedtak i 1950 og 1951 vedtok kommunestyret å bygge på denne staden, men det tok fire år før arealet vart frigjeve.
Romprogramnemnd vart valt i 1953, med skulestyreformann Hallvard Nerbøvik som formann, medan ei førebuingsnemnd vart valt i 1955 med advokat Olav Standal som formann. Arkitekt Ivar Bjordal kom med fleire framlegg til planløysing.
Byggenemnda vart nedsett i 1957 med disponent Hans Driveklepp som formann. I 1958 kunne det lysast ut arbeid på råbygget, som gjekk til firmaet Myren og Braute. Vidare arbeid vart sett vekk til mange lokale underentreprenørar:
I arbeidet med skulen, er det ein person som bør nemnast særskilt, skulestyrar Nils Flø. Han var med i dei fleste nemnder, og han var den som losa oppstarten i den nye skulen vel i hamn.
Anlegget kosta 2,6 millionar kroner pluss 200 000 kroner til utstyr.
Vigslingsfesten vart halde laurdag 18.03.1961, og det er verd å merke seg at opptak frå festen vart kringkasta over riksnettet søndag 19.03 frå kl 13.20 til kl 14.05.
Volda kommune starta innføring av 9-årig skule i 1970, og ungdomsskulen byrja å ta stor plass. Ny Øyra barneskule stod difor ferdig i 1977, og frå då av heitte skulebygget som no skal erstattast Volda ungdomsskule.
Tekst henta frå delar av Per Ytrestøl sin artikkel: Frå Øyra skule til Volda ungdomsskule
Rivearbeid ved Volda ungdomsskule